الاعلام و الاساءة الى الاسلام

السلام عليكم و رحمة الله و بركاته

الفترة اللى فاتت فؤجنا ببعض الافكار الغريبة و المتطرفة

اللى ظهرت على الساحة

الافكار دى كانت ضد الاسلام و تعاليمه

عشان ما ارغيش كتير هضربلكم مثالين واضحين اوى

المثال الاول عن مفكر اسلامى مشهور و طبعا مفيش داعى لذكر اسمه

المهم ان المفكر ده قال بعض الفتاوى الغريبة زى

انه يجوز تبادل القبلات بين الشباب و الفتيات غير المتزوجين

و ان الحجاب مش فرض على المرأة و ان الزواج يجوز بدون شهود وولى

و غيرها من الافكار العجيبة

المثال التانى عن باحثة و كاتبة عايشة فى اوروبا

و برضه مفيش داعى لذكر اسمها

المهم ان الست دى طلعت فى الفضائيات العربية و قعدت

تسب فى الاسلام و الرسول و المسلمين سب علنى واضح

و وصفت المسلمين بانهم مجموعة من المتخلفين

لانهم اتباع مذهب بيعتمد على طمس الحريات و الراى الاخر

ده غير انها بتأيد الرسوم المسيئة للرسول و كمان بتمدح رسامها

انا مش هاتكلم عن الكائنات دى لسبب واحد

هو ان الاسلام حقيقته معروفة مهما حاولوا انهم يشوهها

لكن اللى هاتكلم عليه هو ان واحد زى حالاتى عمره ما سمع

عن الافكار و الفتاوى دى و لا حتى كنت اسمع عن الناس دى اساسا

الا لما شوفتهم على الفضائيات

ليه الفضائيات دايما بتحب تتابع الناس دى ؟

و تحب تجيب اخبارهم اول باول ؟

طب لو عايزين يجيبوا اخبارهم من باب توعية الناس مثلا . يبقى

ليه بيذكروا اسمايهم ماهو كده هيتشهروا و هيتمادوا فى اساتهم للاسلام

بقولكم ايه تعالوا نشوف راى بقية القادة فى الموضوع ده

و السلااااااااااااااااااااااام ختام

انـــا الــــدولــــة

عــــارف انى متأخر طحن وان القادة بتوع البطيخ هيقتلوني
بس ظروفي ربنا عالم بيها

المهم

موضوع النهاردة جميل جدا وبصراحة نفسي اتكلم فيه من فترة

احنا ليه بقينا ناس بتعمل احزاب وتفرقات اكتر ما بتغسل سنانها

انا كل اللي اعرفه انى مسلم

مش اخواني ولا حزب وطني مش يساري ولا يمين ولا وسط معتدل

مفيش حد علي وجه الارض يستحق انى امشي وراه الا الرسول عليه الصلاة والسلام وهو قال

ان الامة هتنقسم لامم

وانا مش مستعد اكون ضمن الانقسام ده

انا الدولة . دستوري القرآن . جيشي عقلي واحيانا ممكن يكون دراعي . رئيسي الرسول . شعبي نفسي واهلي . وظيفتي مسلم برضه

طظ في اى حزب يقسم بلد او دين او امة لمليون اتجاه

طول ما المسلمين مصريين وتركيين واوربا واسيا ومالك وشافعي
هنفضل كده

وطول ما المصريين مسلمين ومسيحيين واخوان و وطني
برضه هنفضل كده

انا في نظري ان كل الاتجاهات السياسية احقر من اتباعها
وانا ليه اسلم دماغي لحد او لنظرية

احيانا لازم اكون رأسمالي بحت وبعدها بدقيقة اكون شيوعي بحت

يبقي ليه اتبع مجرد نظام

النظام اللى اتبعه ديني لأنه خالي من العيوب

طولت اوى بس والله ما قدرت ابعبر كويس

خير ختام سلالالالالالالالالالالام

الامة الواحدة ... و الإيد الواحدة

السلام عليكم و رحمة الله و بركاته

فى البداية احب اقول ان عمرى مكنت مقتنع بأى اتجاه او فكر سياسى

لان فى اعتقادى دايما ان الامة لازم تكون يد واحدة

فكــرهـا فكــر واحـد

بدون اى تفريقات مذهبية او عنصرية

فمعنى ان يكون فى حاجة اسمها اشتراكية

و حاجة تانية اسمها ليبرالية و حاجة تالتة اسمها اخوان

و حاجات تانية غيرهم

و ان فى ناس بتمشى ورا التيارات و الافكار دى

ده معناه ان فى شرخ كبير موجود فى صفوف امتنا

لان كل واحد فيهم شايف ان فكره هو الاصح من اى فكر تانى

لو احنا عايزين نبقى امة واحدة فعلا

يبقى لازم نبقى يد واحدة ... فكرنا واحد

مش معنى كده انى بدعو انه ميبقاش فى حرية تعبير

او انه ميبقاش فى اصوات معارضة

بالعكس احنا ممكن نعمل نوع من الحوار الوطنى

نجمع فيه جميع فئات و طوائف الامة

اهو منها هنطلع بافكار جديدة واراء فيها نوع من المعارضة

لكنها مش معارضة لمجرد الوصول للكرسى

بالعكس هى معارضة هدفها تصليح الكرسى

فالحل دلوقتى ان كل شاب فى الجامعة يبدأ يصلح فى نفسه

بشرط ان الاصلاح ده يكون نابع من فكره هو مش من اى فكر تانى

بمعنى ان كل واحد فينا يبقى رئيس جمهورية نفسه

متهيألى ممكن تبقى الاوضاع احسن من كده

و السلااااااااااااااااااااام ختام

مش عارف

عودة يا بشرية

دلوقتى قبل ما ادخل فى الموضوع عايز اقول

كل سنة وانتوا بخير

المهم عايز اشوف راى الجنرالات فى موضوع مهم جدا

احنا داخلين على بداية الدراسة وكل اتجاه او فكر سياسى بيحضر ويجهز صفوفه

علشان ينزل الدراسة برجل فى الجامعه

اذا كان اخوان او اشتراكية او ليبرالية او غيره من الافكار

المهم من كل الكلام ده ان اى اتجاه سياسى بيبقى محتاج وقود او اداة يستعملها علشان يحقق غرضه

وده مش موجود فى العمال لانهم مش فاضيين

انما الاداة دى بيلاقوها فى الشباب اللى بيدرسوا فى الجامعه

وهنا الخطر لان الشباب بيبقى عايز يثبت نفسه باى طريقة

والنقطة دى بيستعملها ذوى الاتجاهات السياسية بذكاء وبيعرفوا يوظفوها كويس

وكتير من الشباب بيقعوا فى الخطر ومش بيعرفوا يرجعوا وبيخدموا مصالح وهما مش عارفين كده

وبجد مش لاقى حل للمشكلة دى

هل نقف ضد الافكار دى داخل اسوار الجامعه؟

ولا نفهم الطلبة الصح فين والغلط فين؟

ولا نحارب النظام السبب فى ظهور كل الاتجاهات دى؟

ولا نعمل ايه بالظبط علشان نحمى شبابنا ونفسنا من الفتنة؟؟

والمشكلة ان كل فكر بيبقى مثالى وعنده اهداف تصلح الكون بس دى عبارة عن اهداف

مجرد اهداف على ورق

والهدف الرئيسى هو الكرسى

ودلوقتى مستنى رأى الجنرال هاكر والجنرال التنين فى الموضوع ده

والسلام عليكم ورحمة الله وبركاته

الحب و البطيخ

السلام عليكم و رحمة الله و بركاته

فى الزمن ده بنلاقى كتير من الشباب

خصوصا اللى ربنا كرمه و دخل جامعة

بيدور على قصة حب يعيش فيها شوية

و بعد كده ينهيها حسب مزاجه

زى ما قال الجنرال هاكر

اصبح الحب هو هم الشباب

و اللى اخد حجم اكبر من اهتمام الشباب

ده طبعا ليه اسباب منها

قلة الوعى الدينى و الاخلاقى عند الشباب

و طبعا عدم الاحساس بالمسئولية

و عدم وجود انشطة كويسة يقضى الشباب و قتهم فيها

تقدروا تقولوا كده ان معظم وقتنا مبنعملش حاجة

قاعدين لا شغلة و لا مشغلة

للاسف اغلب قصص الحب فى الجامعة او فى مرحلة الشباب

بتنتهى دايما بالفشل

حتى كمان احنا اصبحنا غير مدركين للواقع

يعنى ازاى شاب بيدرس دلوقتى و بعد اما يخلص دراسته

هيبقى قدامه لسه الجيش و لسه كمان هيكون نفسه بعد الجيش

بعد كل ده تفتكروا هيبقى عندنا كام قصة حب حقيقة هتنتهى بالجواز

بالنسبة بقى للاستاذ اسامة منير

فكرة البرنامج بتاعه فكره مستوردة من الخارج

للاسف انا شوفت حالات كتيرة كانت بتسمع البرنامج ده

و اتأثروا كتير بارائه و بقوا بينفذوها كمان

فى امور كتيرة فى حياتنا تستحق اهتمامنا اكتر

من البرامج دى

فى اراء كتيرة تستحق اننا نتأثر بيها و نطبقها فى حياتنا العملية

ليه دايما بنختار الطرق الملتوية الغير ممهدة

بس كفاية كده عليكم لحسن أنا بدأت ادخل فى العمق

و السلاااااااااااااااااااااااام ختام

بيقولوا حب

صباح الخير يا بشرية



واحب اوجه شكرى للجنرال هاكر على طرحه للموضوع



وكمان احب ارخم عليه واخد منه المايك علشان اقول انا كمان راى



المهم الموضوع الناهردة عن الحب



وقال ايه بكل الحب هانرغى فى الحب



مقدما يعنى الحب ده انواع



والحب اللى بنقصده الناهردة هو حب قيس لليلى



يعنى الحب اللى بين الشباب مش الحب الفطرى



المهم الحب ده هو اعقم حب ممكن تشوفه او تمر بيه



الحب بالطريقة دى هو عبارة عن لعب عيال



وبيبقى شعور سخيف ان واحد بيحب واحدة لمجرد انه عايز يعيش قصة حب



ولو حتى مع معزة فى الشارع



او واحدة عايزة بغل يخطفها علشان يفضلوا يحبوا بعض



وكأن ده هو هدفهم فى الحياة



يعنى اللى بيذاكر بيذاكر علشان يعجب واحدة



واللى بتشتغل بتشتغل علشان تلاقى اى اهبل يحبها



الناس نسيت مهمتها على الارض



هو بعد الكلام ده انا مش هاقول انى معصوم او حكيم



انا اه عشت قصة حب بس عقيمة



انما انا فعلا كنت متخلف لما حبيت لانى فعلا لوهلة نسيت حاجات كتير



انما عرفت ارجع زى ما انا



المهم من كل الرغى ده ان الحب ده احساس عقيم



ومستنى راى الجنرال التنين فى الموضوع



والى لقاء فى موضوع تانى اذا كان ليا عمر



سلام

الحب علي 100.6 بطيخ علي كيف كيفك

السلام عليكم
صباح الفل يا بشرية

طبعا انا اللى عليا الدور المرة دي احط اول بوست

وطبعا هرش قدام المدونة وابخر بقي عشان النفس واجيب فطار

اممممم أمري لله بقي اهلا بكل الزباين يوه قصدي القراء

موضوعنا اللى فات ... واللى فات مات . كان عن الصداقة

طب المرة دي نتكلم في ايه ؟ اممممممممم خلاص نتكلم عن الحب ما احنا مش ورانا غير .

بس بقي عشان انا هتقمص شخصية اسامة منير

بكل الحب هنتكلم عن الحب علي 100.6 بطيخ علي كيف كيفك
النهاردة هنتكلم عن هبل وجنان وعبط الحب

اه شكلي هستظرف بقي

لا وربنا ما هستظرف

بس عاوز أعرف حاجة
احنا ليه مش ورانا غير الحب ؟

تلاقي الواحد ولا الواحد تقوله ايه حلمك

الواد يقول : ياعم الاقي واحد احبها تكون زي هيفاء ونانسي في بعض

ولو تكون غنية وتصرف عليا كون قشطة اوى.

البنت بقي : ياختي الاقي اي كلب اتجوزه ويخطفني علي حمار حتي مش لازم حصان

ولو يكون غني ومقطقط (مش وسيم يعني مقطقط يعني شيك) .

طب برة تلاقيهم يقولوا اكون حياة علمية وعملية واعمل لمستقبلي ومستقبل البلد

يحسسك ان سمير الاسكندراني بيتكلم (نبني وننتج نعلي ونسمي كل خطوة بألف ميل)

طب ليه احنا كده وكل همنا اغاني وبتاع

نفضل نتفرج علي نانسي عجرم وتفضل تقول الدنيا حلوة الدنيا حلوة

جزعت نفسنا .

ونتفرج علي تامر حسني . المصيبة انه لازم يفرجنا علي شعر صدره

والريحة اجاركم الله .


احنا ليه بقينا كده

همنا الحب وبس عشان كده قلة مننا اللى بتلاقي الحب الصح غير كده بيكون مراهقة بنسبة 99%

ولا اسامة منير اللى انا فضلت اتريق عليه فوق ده شخصية تجيب شلل اطفال وربنا

طب اقولكم

احنا نشوف رآي التنين و مولوتوف ...

سلام يا بشرية