الحب علي 100.6 بطيخ علي كيف كيفك

السلام عليكم
صباح الفل يا بشرية

طبعا انا اللى عليا الدور المرة دي احط اول بوست

وطبعا هرش قدام المدونة وابخر بقي عشان النفس واجيب فطار

اممممم أمري لله بقي اهلا بكل الزباين يوه قصدي القراء

موضوعنا اللى فات ... واللى فات مات . كان عن الصداقة

طب المرة دي نتكلم في ايه ؟ اممممممممم خلاص نتكلم عن الحب ما احنا مش ورانا غير .

بس بقي عشان انا هتقمص شخصية اسامة منير

بكل الحب هنتكلم عن الحب علي 100.6 بطيخ علي كيف كيفك
النهاردة هنتكلم عن هبل وجنان وعبط الحب

اه شكلي هستظرف بقي

لا وربنا ما هستظرف

بس عاوز أعرف حاجة
احنا ليه مش ورانا غير الحب ؟

تلاقي الواحد ولا الواحد تقوله ايه حلمك

الواد يقول : ياعم الاقي واحد احبها تكون زي هيفاء ونانسي في بعض

ولو تكون غنية وتصرف عليا كون قشطة اوى.

البنت بقي : ياختي الاقي اي كلب اتجوزه ويخطفني علي حمار حتي مش لازم حصان

ولو يكون غني ومقطقط (مش وسيم يعني مقطقط يعني شيك) .

طب برة تلاقيهم يقولوا اكون حياة علمية وعملية واعمل لمستقبلي ومستقبل البلد

يحسسك ان سمير الاسكندراني بيتكلم (نبني وننتج نعلي ونسمي كل خطوة بألف ميل)

طب ليه احنا كده وكل همنا اغاني وبتاع

نفضل نتفرج علي نانسي عجرم وتفضل تقول الدنيا حلوة الدنيا حلوة

جزعت نفسنا .

ونتفرج علي تامر حسني . المصيبة انه لازم يفرجنا علي شعر صدره

والريحة اجاركم الله .


احنا ليه بقينا كده

همنا الحب وبس عشان كده قلة مننا اللى بتلاقي الحب الصح غير كده بيكون مراهقة بنسبة 99%

ولا اسامة منير اللى انا فضلت اتريق عليه فوق ده شخصية تجيب شلل اطفال وربنا

طب اقولكم

احنا نشوف رآي التنين و مولوتوف ...

سلام يا بشرية

جاست مقدمة

فى البداية يا مراحب بكل اللى متابعنا

وكمان اللى متابع متابعنا

واللى نفسه يتابعنا

واللى مش متابعنا ودخل لقيناه متابعنا

ايه العك ده كله؟؟؟

المهم تنظيمنا ده عبارة عن تنظيم شبابى

كما نوه القائد الاعلى التنين

ورئيس الاركان احمد هاكر

التنظيم بتاعنا مش بالاسلحة

ولا القنابل

تسليحنا بالبطيخ

احنا شباب بسيط جدا بس بنثور على الوضع

هاتلاقى هنا مناقشة لكل اللى بيدور فى دماغنا

وكل مشاكل مجتمعنا اللى عايشين فيه

مش احنا اللى هانصلح الكون

بس بنقول بلاش غلط

هنا هانتحرر من كل القيود والاعراف

احنا مش بنكتب علشان نبقى مشهورين ولا للتنفيس

احنا ممكن نكون عايشين مراهقة

بس مراهقة لذيذة

احنا بنكتب وبنوجه رسالتنا

جايز مافيش حد يقرى

بس برغم كده هانكتب ونعبر

بس كده كلام فى المقدمة

اما عن الموضوع الى طرحه القائد التنين

فاعتقد انى ما اقدرش افيد او اقول فيه اى راى

لانى وبكل صراحة عضمى طرى فى الحكاية دى

وكفاية عليا انى كتبت مقدمة فى المدونة وده اكبر شرف ليا

ومنتظر رئيس الاركان هاكر انه ينزل بموضوعه

وشكرا

العقل = بطيخة

أولاً السلام عليكم
طبعاً التنين قال كل حاجة بس برضه نوضح
ماهو البطيخ
السلاح العجيب ده د
زمان كان عندنا حاجة كده جوا دماغنا اسمها العقل او المخ
دلوقتي انطمث العقل ده وبقي زي البطيخة
مش مستوي وملوش لزوم من برة( اخضر )
رغم انه قوي ومستوي وشغال من جوا (احمر)
اخضر من برة واحمر من جوا يبقي البطيخ ... او يبقي العقل برضه
احنا بقي 3 شباب
اعتقد ان البطيخ عندنا مستوي اوى وكويس
مش قرعة يعني
مش عاجبنا الوضع
في كل حاجة قررنا نرفع سلاح البطيخ
ونتمرد علي الوضع الحالي
ومش هنسهر في هبلنا ليالي
لأ هنحاول نفكر وننفذ ونرضي عقلنا وقبله نرضي ربنا

ندخل في موضوع الواد التنين
موضوع الصحاب

هل زمالة او صحاب واصدقاء
انا يمكن حكمي بيختلف شويتين
يعني بقسم الصحاب لعدة انواع
1- معارف 2- زمايل 3- صحاب 4- اصدقاء 5- اخوات
بمعني ان الصحوبية والصداقة عندي ممكن توصل لأنى اعتبر حد اخويا
طب ده صح ؟
صراحة انا مش عارف
بس الصاحب ممكن يأثر علي البني ادم اكتر من والده ومن تربيته
صعب شوية الحكم
بس يمكن انا كل صحابي بالنسبة ليا مواقف واخلاق
وصاحبي بحسب عليه الحرف لحد ما يوصل لأنه يبقي اخويا او معرفة
ممكن ده يحصل في وقت قصير جدا وممكن ياخد سنين
يمكن لحد 5 شهور فاتوا كان ليا اتنين صحاب هما اللى بعتبرهم اخوات
لحد ما ربنا كرمني بصحاب تاني اكتر
يمكن دلوقتي بعتبرهم اخواتى هما كمان
ربنا يرزقنا بالصحبة الصالحة
بصراحة الواحد مش لاقي كلام يبعبر بيه
خلاص نسيب الواد مولوتوف يفرقع هنا
التنين قال كلام من الاخر
ودلوقتي انا مستني مولوتوف يجيب الخلاصة

انزل ببطيختك يا مولوتوف

كلام عن البطيخ

السلام عليكم ورحمة الله و بركاته

فى البداية و بدون مقدمات

احنا تنظيم مسلح ليه 3 قواد

لاء مش عايز حد يخاف او يقلق

احنا مسلحين ااااه

لكن مش بسلاح نووى و لا بصواريخ عابرة للقارات

انما احنا مسلحين بالبطيخ

و ده سلاح فريد من نوعه لونه اخضر من بره و احمر من جوه

عشان محدش يفهم غلط بس

ميزة السلاح ده اللى هو البطيخ طبعا

انه سلاح مش بتاع دمار و خراب

بل بالعكس ده سلاح ايجابى ممكن يساهم و يساعد

على تغيير الدنيا من حوالينا

ما علينا من الرغى ده كله

نخش بقى فى موضوعنا

كلنا لما لما جينا ندخل الجامعة

بدانا نكون صداقات و علاقات كتيرة

السؤال دلوقتى ... ازاى تعرف ان الشخص

اللى قدامك ممكن يبقى صديق ليك و لا لاء

بمعنى تانى

لو اى حد جه و اتعرف عليك

هل انتوا كده بقيتوا اصحاب خلاص و لا ايه النظام بالظبط

انا عن نفسى فكرت فى فكره بسيطة

و هى ان الصداقة ليها مدة صلاحية

و الصلاحية تلات انواع

النوع الاول صلاحية دائمة

و دى بياخدها الاصحاب اللى شوفنا منهم تصرفات

فيها حبة كرم على شهامة و حب و مودة

فهما بيعرفونا عشان شخصايتنا مش عشان مصلحة ليهم

و طبعا بيبقى فى بينا و بينهم توافق و تجاوب

النوع التانى بقى و هو الصلاحية المؤقتة القابلة للتجديد

فى النوع ده بنقابل ناس بنكون لسه مش متأكدين من مشاعرهم تجاهنا

يعنى مش عارفين اذا كانوا عارفينا لمصلحة ليهم و لا عشان بيحبونا

ممكن كمان اننا لسه مش مشوفناش منهم

اى موقف جميل يخلينا نتمسك بيهم

فدول ليهم صلاحية مؤقتة بنجددها لفترات تانية

اما النوع التالت و الاخير فهو الصلاحية لازمة الانقطاع

و دى بنديها للاشخاص اللى مش كويسين

و اللى مش على خلق او دين

و دايما بنشوف منهم مواقف مش طيبة

فبالتالى هما ميستحقوش انهم يكونوا اصحابنا فى يوم من الايام

معلش بقى طولت عليكم

و منتظر معاكم ردود باقى قادة التنظيم

يلا بقى سلااااااااااام